Dj´e subi na palanki
dj´e fina si garganta
dj´e fla m´e ta da tanki
ku vos ki ta inkanta
nu konxe ses trofegu
na buska más un votu:
dipos nós é arnegu
fuliadu la pa (di)sgotu
ku djatu ku tabanka
prumesa sima mel
e kre bu karta branka
bu krus riba papel
un bes fladu «djo baka»
fasedu funeral
mas tudu da kalaka
djuntadu ben ku mal
es tudu é dotoradu
na ngana y da-nu badju
ka ten kusa mariadu
k´es ka ta poi na tadju
é santxu la na rotxa
ki foi ses prufesor
bu ta fika na gotxa
si bu ka skodje un kor
pensa é ka bon
ta po-u na konfuzon
es kre-u sima karneru
po ka odja ses eru
es ka kre sidadon
ta toma puzison:
si agrada bo é di-ses
si nau bo é rabés
povinhu la kobon
ta kodje si sinbron
puleru é pa mondon
ki fla m´e sta na don
mas el go xatiadu si
ku votu e ta durba-l
s´e pensa m´e ka si
manhan e ta purba-l
un bes tinha so pai
dipos ben dios pai mai
es tudu dja es kai
p´es sabe m´es ka rai
gobernu é di povu
ki dja ten liberdadi
na kanpu y na sidadi
si vos é más ki fogu
nhos obi nhos matuta
pulítikus di nha tera
na mei di si labuta
nos povu sa ta spera
JOSÉ LUIZ TAVARES
Sem comentários:
Enviar um comentário